काठमाडौं- पाकिस्तान र अफगानिस्तानबीच भएको द्वन्द्वका कारण खानेकुराको भाउ बढेको पाइएको छ । दुई छिमेकी देशबीचको द्वन्द्वका कारण पाकिस्तानमा फलफूल र तरकारीको आपूर्तिमा समस्या उत्पन्न हुँदा भाउ बढेको हो ।

यसबाट खासगरी पाकिस्तान अधिनस्थ जम्मु कश्मीरको व्यापारी मर्कामा परेको द स्टेट्सम्यानले जनाएको छ । व्यापारीका अनुसार एक सातासम्म सीमापार व्यापार बन्द हुँदा अफगानिस्तानबाट आउने गोलभेँडा, प्याज, अनार, अङ्गुर स्याउजस्ता तरकारी र फलफूलको भाउ सबैभन्दा धेरै बढेको छ ।

यसबाट छिट्टै बिग्रिने सामानमा ठूलो क्षति भएको र स्थानीय बजारमा यस्ता सामानको भाउले आकाश छोएको स्टेट्सम्यानले उल्लेख गरेको छ ।

हम्जा नाम गरेका एक जना व्यापारीले गोलभेँडा कुनै समय एक सय रुपैयाँ प्रतिकेजी रहेकोमा अहिले ५ सय रुपैयाँ पुगेको जनाए । यद्यपि स्थानीय प्रशासनले गोलभेँडाको मूल्य ३ सय ९० रुपैयाँ प्रतिकेजी तोकेको छ । तर, व्यापारीहरुले एक किलो गोलभेँडाको ६ सय ५० रुपैयाँसम्म उठाइरहेको जनाइएको छ ।