सनसरी- जब बर्खा लाग्छ तब सप्तकोशी नदी किनारमा डुंगा खियाउँदै दाउरा खोज्न व्यस्त भएका देखिन्छन् माझी समुदायका पुरूष ।

सुनसरीको वराहक्षेत्र नगरपालिका ६ स्थित सप्तकोशी किनारमा कोही डुंगा खियाइरहेका हुन्छन् भने कोही किनारमा उतारिएका दाउरा चिरिरहेका भेटिन्छन् ।

परम्परागत डुंगाको सहयोगमा सप्तकोशीको फिजारिँदो भंगालोसँग पौँठेजोरी खेल्दै यी समुदायका सदस्यहरू पहाडबाट बगेर आएका दाउर बटुलिरहेका हुन्छन् ।

डुंगामार्फत् संकलन गरेका दाउरा उनीहरूले सुनसरीका बजारमा लगेर बेच्छन् । एक ट्याक्टर दाउराबाट उनीहरूले ७ देखि ८ हजारसम्म कमाउँछन् ।

माझी समुदायका मानिस ४० वर्षभन्दा बढी समयदेखि सप्तकोशीबाट दाउरा तान्दै बेच्ने परम्परागत पेशामा छन् । उनीहरू बर्खायाममा कोशीबाट दाउरा तान्छन् । हिउँदमा चाहिँ मानिसलाई वारपार गराउने र माछा मार्ने पेशामा रमाउँछन् ।

यहाँका माझी समुदायको पुर्ख्यौली पेशा नै यही भएको छ । नयाँ पुस्ताका युवाहरू चाहिँ अचेल विदेश पनि जान थालेका छन् ।