काठमाडौं– सिन्धु नदीमा आएको बाढीका कारण पाकिस्तानमा हजारौँ प्रभावित भएका छन् । बाढीका पाकिस्तानको विभिन्न स्थानका हजारौँ बासिन्दा प्रभावित भएका हुन् ।

पाकिस्तानबाट प्रकाशित हुने डन अखबारको अनलाइन संस्करणका अनुसार बाढीले गर्दा मौजा मूर झाँगी, बैत कछेला, पाँज दराएँ, बैत चनार, बैत अशरफ, जर लेघारी र मौजा बलोच खानजस्ता गाउँका बासिन्दा प्रभावित भएका छन् । त्यसैगरी, बाढीले मौजा लोहज, थोरी, समरा झोक खान, बस्ती कान्जो मोहनाजस्ता गाउँ पनि प्रभावित भएको डनले जनाएको छ ।

बाढीले घरसँगै विद्यालय, मस्जिद र अस्पताल पनि बगाएको जनाइएको छ । त्यसबाहेक हजारौँ एकडमा लगाइएको खेतबाली पनि बाढीले बगाएको छ ।

स्थानीय बासिन्दालाई उद्धृत गर्दै डनले जनाएअनुसार कुल ४ सय ५० एकडमध्ये केबल १ सय ७५ एकड जमिनमात्रै बाढीबाट जोगिएको छ । स्थानीयहरुले बाढी प्रभावितलाई राहत प्रदान गर्न पाकिस्तान सरकारसँग माग गरेका छन् ।