काठमाडौं- प्रमुख प्रतिपक्षी नेकपा माओवादी केन्द्रले भिजिट भिसा प्रकरणमा मुछिएका गृहमन्त्री रमेश लेखकले राजीनामा नदिएसम्म संसद् बैठक खुल्न नसक्ने अडान शीर्ष नेतामाझ् राखेको छ।

प्रधानमन्त्री केपी शर्मा ओलीको पहलमा सिंहदरबारमा बसेको तीन ठूला दलका शीर्ष नेताको बैठकमा आफूहरूले पुरानै अडानलाई कायम राखेको प्रमुख सचेतक हितराज पाण्डेले जानकारी दिए ।

‘अहिले छलफल मात्रै भयो । उहाँहरू (सत्तापक्ष) को प्रस्ताव संसद् खोल्नुपर्छ भन्ने आयो । सत्ता पक्षबाट र प्रधानमन्त्रीले पनि संसद् खोलौँ भन्नु भयो ।

गृहमन्त्री रमेश लेखकले पनि राजीनामा होइन, संसद् खोल्नुपर्छ भन्नु भयो’, उनले भने, ‘हामीले सुशासनलाई केन्द्रित गरेर कुरा राख्यौँ । हामीले राजीनामा चाहियो भनेका छौँ । जो विषयवस्तु पहिले राखेका छौँ, त्यो यथावत नै छ भन्यौँ ।’

पाण्डेले बैठकमा ओली, प्रचण्ड र देउवाको कुर्सी समान राखिएको विषयलाई सामान्य भनेका छन् । उनले कुर्सी फेरिए पनि मन उस्तै भएकाले अहिले नै राजनीतिक फेरबदलको कुरालाई अस्वीकार गरे। ‘नयाँ कुरा केही पनि छैन’, उनले भने, ‘तर व्यवस्था जोगाउने विषयमा हामी एक ठाउँ छौँ ।’

पाण्डेले सत्ता पक्ष र विपक्षी गणतन्त्रवादीहरू पहिले नै सबै एक ठाउँमा आइसेकको बताए । उनले राजावादीको आन्दोलनबाट तर्सिने कुनै कारण नरहेको पनि बताए ।