काठमाडौं– मानिसहरुलाई फोन सम्पर्क गरी हामीसँग सस्तोदरमा अमेरिकन डलर छ मिलाई दिन्छौ भनी प्रलोभन देखाउँदै ठगी गरेको आरोपमा एक जना पक्राउ परेका छन् । 

पक्राउ पर्नेमा सिन्धुपाल्चोक बाह्रबिसे घर भई भक्तपुर चाँगुनारायण बस्ने ३९ वर्षीय तारा बहादुर तामाङ रहेका छन् । 

तामाङले नवलपरासी (बर्दघाट सुस्ता पूर्व) गैंडाकोट नगरपालिका-३ ढोडेनीस्थित विभिन्न व्यक्तिहरूलाई फोन सम्पर्क गरी सस्तो दरमा अमेरिकन डलर छ, हामी मिलाई दिन्छौ भनी प्रलोभन देखाई डलरको आकारमा काटिएको कागजको बिटो रुमालमा पोको पारेर दिई नेपाली ३० लाख रुपैयाँ ठगी गरी फरार रहेको आरोपमा  काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले चाँगुनारायण नगरपालिका-३ दुवाकोटबाट पक्राउ गरेको हो ।

उनीमाथि  थप अनुसन्धान एंव आवश्यक कारबाहीको लागि जिल्ला प्रहरी कार्यालय नवलपरासी (पूर्व) पठाइएको प्रहरीले जनाएको छ ।