काठमाडौं– अमेरिकामा तीन दर्जन चिनियाँ र ताइवानी आप्रवासी पक्राउ परेका छन् । अमेरिकामा अवैध रुपमा बसोबास गरिरहेको आरोपमा ३६ जना ताइवानी र चिनियाँ नागरिकलाई पक्राउ गरिएको फक्स न्यूजले जनाएको छ ।

दक्षिण क्यालिफोर्नियाको भूमिगत नाइटक्लबबाट उनीहरुलाई पक्राउ गरिएको हो । होमल्याण्ड सेक्युरिटी इन्भेस्टिगेसन र इन्फोर्समेन्ट एण्ड रिमुभल अपरेशनका अधिकारीहरुले उनीहरुलाई पक्राउ गरेका हुन् ।

यसबारे अमेरिकाको इमिग्रेसन एण्ड कस्टम इन्फोर्समेन्टले सामाजिक सञ्जालमार्फत जानकारी दिएको छ । उनीहरुलाई क्यालिफोर्नियाको लस एन्जल्स शहरबाट पक्राउ गरिएको भएपनि यकिन स्थान र नाइटक्लबको नाम भने खुलाइएको छैन ।

पछिल्लो समय अमेरिकामा अवैध रुपमा बसोबास गरिरहेका आप्रवासीलाई पक्राउ गरी देश निकाला गर्ने क्रम बढ्दै गइरहेको छ ।