सिरहा-भारतको पहलगाममा भएको जघन्य चरमपन्थी हमलामा नेपाली युवा सुदीप न्यौपानेको मृत्यु भएपछि सिरहाको गोलबजारमा प्रदर्शन गरिएको छ ।

पाकिस्तानले चरमपन्थीहरूलाई संरक्षण गरेको भन्दै गोलबजारमा विरोध प्रदर्शन गरिएको हो । धर्मराज हिन्दु सेनाले प्रदर्शन गर्दा गोलबजार तनावपूर्ण बनेको थियो।

बुधबार आयोजित विरोध प्रदर्शनमा सयौँ स्थानीय सहभागी थिए । प्रदर्शनको अगुवाइ कृष्ण गुरागाईं (हनी सिंह) ले गरेका थिए ।

उनले पाकिस्तानी सेना प्रमुख असीम मुनिरको पुतला जलाएका थिए । ‘आतंकको आडमा मित्रता स्वीकार्य छैन,’ भन्दै प्रदर्शनकारीले पाकिस्तानविरोधी नारा पनि लगाए ।

प्रदर्शनमा नेकपा एमालेबाट निर्वाचित गोलबजार नगरपालिकाका मेयर श्याम श्रेष्ठले अघि सारेको ‘नेपाल–पाकिस्तान मित्रता पार्क’ निर्माण योजनाको पनि विरोध भएको छ ।

स्थानीयवासीहरूले यस्तो योजना राष्ट्रहितविपरीत भएको भन्दै तत्काल खारेज गर्न माग गरेका छन् ।

पहलगाम हमलामा नेपाली युवक सुदीप न्यौपानेसहित २७ पर्यटकको ज्यान गएको थियो। नेपाली युवकको मृत्युले देशभर समवेदना र आक्रोशको लहर देखिएको छ ।