काठमाडौं- गत शुक्रबार काठमाडौंको तीनकुनेमा भएको राजावादीहरूको आन्दोलनका क्रममा झडप हुँदा प्रहरीले चलाएको गोली २० जनालाई लागेको खुलेको छ।

दुर्गा प्रसाईं र नवराज सुवेदी नेतृत्वमा राजावादीहरूले गरेको आन्दलनमा हिंसात्मक झडप हुँदा प्रहरीले गोलीसमेत चलाएको थियो ।

त्यसक्रममा १८ जना पुरूष र २ जना महिलासहित २० जनालाई गोली लागेको पुष्टि बुधबार आयोजित पत्रकार सम्मेलनमा प्रहरी प्रवक्ता एवम् डीआईजी दिनेश आचार्यले गरेका छन् ।

‘त्यस आन्दोलनका क्रममा ७४६ राउन्ड अश्रुग्यास हानिएको थियो । प्रहरीले झडपका क्रममा बन्दुकबाट ब्ल्याङ्क १९२ राउन्ड चलाएको थियो । त्यसमा ५८ वटा लाइट राउन्ड हानिएको थियो । पेस्तोलको गोली ३ राउन्ड चलेको छ’, उनले भने, ‘त्यसक्रममा १८ पुरूष र २ महिलासहित २० जनालाई गोली लागेको तथ्यांक प्राप्त भएको छ ।’

राजावादीसँगको झडपका क्रममा ५५ जना नेपाल प्रहरी र २३ जना सशस्त्र प्रहरी घाइते भएको पनि उनले बताएका छन् । झडपका क्रममा अन्य कयौँ घाइते भए पनि सबै विवरण प्राप्त नभएको उनले बताए ।

कोटेश्वरको भाटभटेनी क्षेत्रमा पनि दुईजनालाई गोली लागेकोबारे अनुसन्धान भइरहेको उनले बताए । आचार्यले भाटभटेनी लुट्न पुगेको समूहलाई तितरबितर पार्ने क्रममा त्यस क्षेत्रमा पनि गोली चलेको हुन सक्ने जानकारी दिए ।