काठमाडौं- स्वर्गद्वारी गुठी पीडित मोही किसान संघर्ष समितिले निकालेको प्रदर्शनका क्रममा आइतबार नयाँबानेश्वर क्षेत्रमा झडप भएको छ ।

नयाँ बानेश्वरस्थित निषेधित क्षेत्रनजिक भएको प्रदर्शनलाई प्रहरीले रोक्ने क्रममा झडप हुँदा प्रहरी वृत्त सिंहदरबारका डीएसपी गंगा पौडेल घाइते भएका छन् ।

झडपका क्रममा टाउकोमा चोट लागेका पौडेलको मीनभवनस्थित निजामती कर्मचारी अस्पतालमा उपचार भइरहेको छ ।

जुलुस गौशालास्थित पशुपति धर्मशालाबाट ब्यानर, प्लेकार्ड र हलोसहित धर्मशालाबाट निकालिएको थियो । जुलुस नयाँ बानेश्वरमा पुगेर धर्ना बस्न खोजेपछि झडप भएको हो ।

पीडितहरूले जमिनमाथिको द्वैध स्वामित्व अन्त्य गर, मोही पूर्जाको हक सुनिश्चित गर, गुठी ऐन जारी गर, धर्मको नाममा शोषण गर्न पाइँदैनसहितका नाराबाजी गरे ।