काठमाडौं – नायक मुकुन भुसालले पहिलो पटक खलपात्रको भूमिका निर्वाह गर्ने भनिएको फिल्म ‘कर्मा’को पहिलो चरणको छायाङ्कन सकिएर पूरा भएको छ ।

दाङका विभिन्न स्थानमा ४६ दिन छायाङ्कन गरेर निर्माण टोली काठमाडौं फिर्ता भएको छ । मंसिर अन्तिमबाट निर्देशक सौरभ चौधरी कलाकारको टोली लिएर छायाङ्कनमा निस्किएका थिए ।

निर्देशक चौधरीका अनुसार काठमाडौंमा १० दिनको छायाङ्कन तालिका पूरा भएपछि खिचाइको काम पूरा हुनेछ । उनी भन्छन्, ‘अब दुई साता भित्र नै छायाङ्कन सक्ने योजना छ ।’

फिल्म पूर्वघोषित मिति अर्थात आगामी नयाँ वर्षमै प्रदर्शनमा आउनेमा उनी ढुक्क छन् । बजारमा चलेको पूर्वनिर्धारित मितिमा फिल्म प्रदर्शनमा आउँदैन भन्ने हल्लाकोपछि नलाग्न उनको आग्रह छ ।

‘कर्मा’का नायक विपिन कार्की हुन् । उनलाई यो पटक पहिलाको भन्दा भयङ्कर एक्सन अवतारमा उतार्ने निर्देशकको दाबी छ । नायिका उपासनाले यस फिल्मबाट पहिलो पटक विपिनसँग सहकार्य गर्दैछिन् ।

फिल्मको कथावस्तुको विषयमा निर्माणपक्षले अहिले केही पनि बताएको छैन । मुख्य कलाकार बाहेक अन्य कलाकारहरू गोप्य राखिएको छ ।

एक्सन ड्रामा जनरामा निर्माण भइरहेको ‘कर्मा’को कथा निर्देशक चौधरी स्वयंले लेखेका हुन् । आर्टिस्टिक इन्टरटेनमेन्टको प्रस्तुति रहने यस फिल्मलाई वसन्त लम्सालले निर्माण गरिरहेका छन् ।