काठमाडौं– भारतले वार्ता र कूटनीतिका माध्यमबाट प्यालेस्टाइनको गाजा क्षेत्रमा जारी द्वन्द्व समाधान हुनुपर्ने जनाएको छ ।

संयुक्त राष्ट्रसंघका लागि भारतका स्थायी प्रतिनिधि हरिश पर्वतेनानीले प्यालेस्टाइन र इजरायलबीच जारी द्वन्द्वको शान्तिपूर्ण समाधान हुनुपर्ने आफ्नो मुलुकको धारणा रहेको उल्लेख गरेका हुन् ।

उनले यसका लागि ‘दुई राज्य समाधान’ को पक्षमा भारत रहेको पनि बताए । अमेरिकाको न्यूयोर्कमा आयोजित उच्चस्तरीय अन्तर्राष्ट्रिय सम्मेलनलाई सम्बोधन गर्दै उनले गाजा क्षेत्रमा मानवीय अवस्था अत्यन्त नाजुक रहेको पनि उल्लेख गरे ।

उनले गाजा क्षेत्रमा युद्धविरामको पहल गरिरहेका सबै मैत्रिपूर्ण मुलुकहरुप्रति पनि कृतज्ञता व्यक्त गरे ।

उनले गाजा क्षेत्रमा हमासले बन्धक बनाएका सबै बन्दीलाई रिहा गर्न पनि आह्वान गरे ।