काठमाडौं- भारतका नौसेनाप्रमुख एडमिरल दिनेश के. त्रिपाठी जापान भ्रमणमा पुगेका छन् । त्रिपाठी चारदिने जापान भ्रमणमा गएका हुन् ।

उनको भ्रमणको उद्देश्य जापान र भारतबीच कायम द्विपक्षीय रक्षा सहकार्यलाई अभिवृद्धि गर्नु रहेको भारतीय समाचार संस्था एएनआईले जनाएको छ । जापानमा रहँदा उनले उच्च रक्षा एवम् नौसैनिक अधिकारीहरुसँग भेटवार्ता गर्नेछन् ।

भेटवार्ताका क्रममा दुई मुलुकका सैन्य अधिकारीबीच समुद्री सुरक्षा, प्राविधिक साझेदारी, नौसैनिक सहकार्यका नवीन आयामहरुको पहिचानजस्ता विषयमा छलफल हुनेछ । भारतीय नौसेनाले द्विपक्षीय एवम् बहुपक्षीय रक्षा सहकार्यलाई थप सुदृढ बनाउन आफ्नो मुलुक प्रतिबद्ध रहेको जनाएको छ ।

पछिल्लो समय भारतले हिन्द प्रशान्त क्षेत्रमा आफ्नो सक्रियता बढाउँदै लगेको छ । सोही अनुसार यसअघि गत अप्रिल महिनामा एडमिरल त्रिपाठीले तान्जानियाको भ्रमण गरेका थिए ।