काठमाडौं– अमेरिकी राष्ट्रपति डोनाल्ड ट्रम्प एकपछि अर्को गरी विभिन्न मुलुकमाथि लगाइने करको दर घोषणा गर्दै गएका छन् । जसअन्तर्गत उनले दक्षिण एसियाली मुलुकहरू माथि पनि करको दर तय गरेका छन् । 

अमेरिकाले अहिलेसम्म दक्षिण एसियाका सात मध्ये चार देशमाथि करको दायरा तय गरिसकेको छ । अमेरिकी राष्ट्रपति ट्रम्पले फरक–फरक मितिमा दक्षिण एसियाका भारत, पाकिस्तान, बंगलादेश र श्रीलंकामाथि लगाइने करको घोषणा गरेका हुन् ।

उनले दक्षिण एसियामा सबैभन्दा बढी भारत र सबैभन्दा कम पाकिस्तानमाथि कर लगाएका छन् । ट्रम्पले भारतमाथि २५ प्रतिशत र पाकिस्तानमाथि १९ प्रतिशत कर घोषणा गरेका छन् । 

यस्तै अमेरिकाले बंगलादेश र श्रीलंकामाथि भने समान करको दायरा निश्चित गरेको छ । बीबीसीका अनुसार अमेरिकाले यी दुई मुलुकमाथि २० प्रतिशत कर घोषणा गरेको छ ।