काठमाडौं– भारतले इजरायललाई अत्याधुनिक हतियार प्रणाली निर्यात गर्ने भएको छ । भारतीय समाचार च्यानल जी न्यूजका अनुसार भारतीय रक्षा कम्पनीले इजरायलसँग महत्वपूर्ण सम्झौता गरेको छ ।

यससँगै भारतले इजरायललाई अत्याधुनिक रकेट लन्चर प्रणाली निर्यात गर्नेछ । उक्त सम्झौताबारे विस्तृत जानकारी भने सार्वजनिक गरिएको छैन ।

उक्त सम्झौता १ हजार ४ सय करोड भारतीय रुपैयाँ बराबरको रहेको जी न्यूजले उल्लेख गरेको छ । भारतीय संस्थाले इजरायललाई निर्यात गर्ने रकेट लन्चर प्रणालीको मारक दूरी ३ सय किलोमिटरसम्म रहेको जनाइएको छ ।

पछिल्ला केही वर्षयता भारतबाट सैन्य उपकरण एवम् हतियार प्रणालीको निर्यात बढ्दै गएको छ । सन् २०१३–१४ मा भारतले हतियार एवम् रक्षा उपकरणको निर्यातबाट ६ सय ८६ करोड भारतीय रुपैयाँ आम्दानी गरेको थियो । त्यसको १० वर्षपछि अर्थात् सन् २०२३–२४ मा यो बढेर २३ हजार ६ सय २२ करोड भारतीय रुपैयाँ पुगेको छ ।