काठमाडौं– फिलिपिन्सका रक्षामन्त्रीले चीनप्रतिको विश्वास र विश्वसनीयता गुम्दै गएको बताएका छन् । सिङ्गापुमा आयोजना भइरहेको शाङ्ग्री–ला संवादका क्रममा फिलिपिनी रक्षामन्त्री गिल्बर्टो टेयोडोरोले यस्तो बताएका हुन् ।

उनले बढ्दो चिनियाँ सैन्य शक्तिको प्रभाव निर्विवाद रहेको समेत बताए ।

‘चिनियाँ गतिविधि अझ विस्तारवादी र आक्रामक हुँदै गएको छ । उनीहरुको शक्ति प्रदर्शनले तीव्रता पाइरहेको छ, र, हामीलाई पश्चिमी फिलिपिनी सागरमा उनीहरुको गतिविधिको बानी परिसकेको छ तर उनीहरुले आफ्नो क्षेत्र विस्तार गरेका छन् ।’ उनलाई उद्धृत गर्दै समाचार संस्था रोयटर्सले जनाएको छ । दक्षिण चीन सागरलाई फिलिपिन्समा पश्चिम फिलिपिनी सागर बन्ने गरिन्छ ।

उनले जे जस्तो भएपनि अमेरिका र फिलिपिन्सले शान्तिपूर्ण रुपमा चिनियाँ गतिविधि रोक्ने प्रयास गरिरहेको बताए । फिलिपिन्स र अमेरिकाबीच लामो समयदेखि रक्षा सन्धि कायम छ ।

फिलिपिन्स र चीनबीच दक्षिण चीन सागरको सार्वभौमिकतालाई लिएर विवाद रहँदै आएको छ । फिलिपिन्सले दक्षिण चीन सागरमा चिनियाँ गतिविधिको विरोध गर्दै आएको छ ।