काठमाडौं– डच रक्षामन्त्रीले आफ्ना उद्योगहरुमा चीनले जासुसी गतिविधिलाई बढाएको आरोप लगाएका छन् । सिङ्गापुरमा आयोजना भइरहेको शाङ्ग्री–ला संवादका क्रममा डच रक्षामन्त्री रुबिन ब्रेकेल्मान्सले चीनमाथि यस्तो आरोप लगाएका हुन् ।

उनले सेमिकण्डक्टर उद्योगलाई लक्षित गरी जासुसी गतिविधि गरिरहेको आरोप लगाएका हुन् । गत वर्षको अप्रिल महिनामा डच सैन्य जासुसी निकायले नेदरल्याण्ड्सको सेमिकण्डक्टर, हवाइ र समुद्री उद्योगलाई चिनियाँ जासुसहरुले निशाना बनाएको प्रतिवेदन सार्वजनिक गरेको थियो ।

समाचार संस्था रोयटर्सका अनुसार शाङ्ग्री–ला संवादको साइडलाइनमा मन्त्री ब्रेकेल्मान्सलाई यसबारे सोधिएको थियो । जवाफमा उनले चिनियाँ जासुसी गतिविधि अझै चलिरहेको र चीनबाट साइबर जोखिम पनि बढिरहेको बताएका थिए ।

चिनियाँ गतिविधि अझै बढ्दो क्रममा रहेको उनको भनाइ छ ।

यसबारे चिनियाँ विदेश मन्त्रालयले कुनै टिप्पणी नगरेको रोयटर्सले उल्लेख गरेको छ । चीनले यस्ता आरोपको खण्डन गर्दै आएको छ ।