काठमाडौं– उपप्रधानमन्त्री एवम् शहरी विकासमन्त्री प्रकाशमान सिंहले कोभिडले समस्यामा परेको अर्थतन्त्र अहिले बिस्तारै लयमा आउन थालेको बताएका छन् । 

अन्तर्राष्ट्रिय मजदुर दिवसको अवसरमा नयाँ बानेश्वरमा आयोजित  बृहत् खुला रक्तदान तथा निःशुल्क स्वास्थ्य शिविर कार्यक्रममा उनले अर्थतन्त्रका सूचकाङ्कहरू अहिले सकारात्मक देखिएको बताएका हुन् । अर्थतन्त्रलाई लयमा ल्याउन व्यवसायी र उद्यमीहरूको योगदान रहेको पनि सिंहले बताए ।

 ‘कोभिडका कारण अर्थतन्त्रमा सेडब्याक भएको थियो । यसलाई लयमा ल्याउन व्यवसायी, उद्योगीहरू र नेपालको समग्र अर्थतन्त्रको विकासमा रुचि राख्नेहरू सबै मिलेर अघि बढेकै कारण अहिले अर्थतन्त्रका सकारात्मक संकेत देखिएको छ,’ उनले भने । 

त्यस्तै, उपप्रधानमन्त्री सिंहले स्वास्थ्य शिविर आयोजना हुनु सकारात्मक रहेको धारणा राखे । ‘स्वास्थ्यमा पहुँच नहुने र तत्काल परीक्षण गर्नुपर्ने बिरामीहरूका लागि निःशुल्क स्वास्थ्य शिविरको महत्त्व छ,’ उनले भने । 

नयाँ बानेश्वर व्यापार व्यवसायी संघकाे आयोजनामा भएको सो कार्यक्रममा बाग्मती प्रदेशका आन्तरिक मामिला मन्त्री सुरजचन्द्र लामिछाने, प्रदेश सांसद दीपेन्द्र श्रेष्ठसहित स्थानीय जनप्रतिनिधिको उपस्थिति तियो ।