काठमाडौं – टेलिसिरियल ‘सक्किगोनि’ टिमले निर्माण गरेको फिल्म ‘लाज शरणम्’को तीन पोस्टर सार्वजनिक भएको छ । निर्माण पक्षले अंग्रेजी नयाँ वर्षको अवसर पारेर बुधबार तीन पोस्टर सार्वजनिक गरेको हो ।

एक पोस्टरमा नायक विजय बराल र हरिश निरौला कक्रोज फिचर्ड छन् । कक्रोच जट्टाधारी जोखीको हुलियामा प्रस्तुत भएका छन् । उनको पिठ्यूमा विजय बराल चढेका छन् भने उनले ‘फेरी’ फुकिरहेको देख्न सकिन्छ । पोस्टरले क्रकोच फिल्ममा अघोरीको भूमिकामा रहेको संकेत गर्छ ।

अर्को पोस्टरमा कफिनको आकारभित्र विजय, कक्रोच, अर्जुन घिमिरे ‘पाँडे’ र सागर लम्साल ‘बले’ छन् । यो पोस्टरमा पनि क्रकोच अगोरीकै हुलियामा छन् ।

अर्जुन घिमिरेलाई सिरियलकै ‘पाँडे’ चरित्रमा प्रस्तुत गरिएको हो । यसबाट उनी फिल्ममा पनि उनी पाँडेको भूमिकामा हुनेसक्ने अनुमान गर्न सकिन्छ ।

सागर भने फिल्ममा बलेको भूमिकामा नरहेको पोस्टरले प्रष्ट पार्छ । उनी पोस्टरमा आश्चर्यमा मुद्रामा प्रस्तुत छन् ।

अर्को पोस्टरमा भने निर्माण पक्षले एक पात्र गोप्य राख्न खोजेको छ । सो पोस्टरमा एक पात्र पुरुष छन् । उनको अनुहार देखाइएको छैन । ती पुरुषको हातमा तराजु छ भने शरीरमा एउटा तौली मात्र बेरेका छन् । निर्माण पक्षले यो पोस्टरमार्फत दर्शकाम कौतुहलता जगाउन खोजेको छ ।

यो फिल्म घोषणादेखि नै चर्चामा छ । पोस्टरले यसको चर्चा थप बढाउनेमा निर्माणपक्ष आशावादी छ । फागुन १४ बाट प्रदर्शनमा आउने यस फिल्मको निर्देशक कुमार कट्टेल जिग्री हुन् । कथा पनि उनकै हो ।

फिल्ममा विजय, अर्जुन, कक्रोच, बलेसहित मुकुन्द श्रेष्ठ, प्रशान्त ताम्राकार, महेश त्रिपाठी, अर्पण थापा, रेणु योगी, माला लिम्बुलगायतको अभिनय रहेको छ ।

जेपीटी क्रियसनको ब्यानरमा निर्माण भएको यस फिल्मको निर्माता नवीन श्रेष्ठ निर्माता हुन् ।