काठमाडौं– फिल्म ‘कबड्डी’ श्रृखंलामा ‘मैयाँ’को भूमिकाबाट चर्चामा आएकी रेश्मा गुरुङ छायाङ्कनमा सहभागी हुन नेपाल आएकी छन् ।

असोज अन्तिमबाट छायांकन हुने फिल्म ‘रिमै’का लागि उनी आइतबार अमेरिकाबाट काठमाडौं आइपुगेकी हुन् ।

त्रिभुवन विमानस्थल परिसरमा सञ्चारकर्मीसँगको कुराकानीमा रेश्माले राम्रो कथा र नायकहरुका कारण फिल्ममा काम गर्न उत्साहित रहेको बताइन् ।

भनिन्, ‘विशेषगरी फिल्म गुरुङ संस्कार र संस्कृतिमा आधारित रहेर निर्माण हुन लागेकाले पनि काम गर्न तयार भएकी हुँ । सिनेमाको मुख्य भूमिकामा दयाहाङ राई र सौगात मल्ल भएकाले पनि काम गर्न उत्साहित छु ।’

अमेरिकामा बसोबास गर्दै आए पनि फिल्मबाट टाढा नरहेको उनले बताइन्। प्राविधिक कारणले आफ्नो फिल्म प्रदर्शनमा नआउँदा लामो समय हलमा दर्शकले देख्न नपाएको उनी स्वीकार गर्छिन् ।

भन्छिन्, ‘मैले केही वर्षअघि मात्रै एक फिल्ममा काम गरेकी थिएँ। त्यो सिनेमा अहिलेसम्म प्रदर्शनमा आएको छैन । त्यसैले लामो ग्याप देखियो ।’

रेश्माले विसं २०७७ को अन्तिमदेखि छायाङ्कन सुरु भएको फिल्म ‘क्रसरोड’मा काम गरेकी थिइन् । उक्त फिल्म प्रदर्शनमा आएको छैन ।

‘रिमै’मा रेश्मा, सौगात, दयाहाङसहित कविता आले र माओत्से गुरुङको मुख्य भूमिका रहनेछ । यी कलाकारहरुको ‘कबड्डी श्रृखंलामा पनि अभिनय रहेको छ ।

निर्माण पक्षका अनुसार आगामी घटस्थापनामा फिल्मको शुभमुहूर्त हुनेछ । असोज २८ गतेदेखि गोरखाको सिरानचोकबाट छायांकन सुरु हुनेछ ।

उपेन्द्र सुब्बाले लेखेको यस फिल्मको निर्देशन खिलबहादुर गुरुङ गर्नेछन् । निर्माता वीरबहादुर घलेले हुन् ।