काठमाडौं- वि.सं. २०८० को नयाँ वर्षलाई लक्षित गरी प्रदर्शनमा आएको फिल्म ‘जारी’ले कीर्तिमानी व्यापार गर्यो । त्यस सालको सबैभन्दा बढी व्यापार गर्ने फिल्म ‘जारी’ नै थियो । यसले घरेलु बजारमा १७ करोडभन्दा माथि व्यापार गरेको बताइन्छ ।
यस फिल्ममा निर्देशक रामबाबु गुरुङ निर्मात थिए । लेखक उपेन्द्र सुब्बाको यो डेब्यू निर्देशन थियो ।
अहिले पनि ‘जारी’ धेरै व्यापार गर्ने फिल्मको सूचीमा अग्रस्थानमा आउँछ । फिल्म व्यवसायिक र अन्य मानकबाट पनि सफल सावित भयो ।
तर, यही फिल्मका कारण निर्देशक एवम् लेखक उपेन्द्र र निर्माता रामबाबुको सम्बन्धमा चिसो पस्यो । सम्बन्ध बिग्रनुको कारण ‘जारी’कै आर्थिक लेनदेनको रहेको यी दुईनिकटको बुझाइ छ ।
यद्यपि रामबाबु र उपेन्द्र दुवैले यसबारे बोलेका छैनन् । उनीहरूले नबोलेसम्म यो कुरा अड्कलबाजीमै सीमित हुन्छ ।
सर्वाजनिक रुपमा आरोप–प्रत्यारोपमा नउत्रिए पनि यी दुईको सम्बन्ध बिग्रिएको प्रष्ट छ । कबड्डी श्रृङ्खला र जारीमा सहकार्य गरेका दुवैले एकल काम गरे ।
रामबाबुले ‘डिग्री माइला’ निर्देशन गरे । उपेन्द्रको लेखन र निर्देशन रहेको ‘मनसरा’ प्रदर्शनमा आयो । दुवै अपेक्षित रुपमा चलेनन् । जेनतेन लगानीसम्म सुरक्षित गरे ।
त्यहीबेला फिल्मीवृतमा कुरा चल्यो– उपेन्द्र र रामबाबुको बेमेल वक्स अफिस कलेक्सनमा देखियो ।
रामबाबु निर्देशनमा दख्खल राख्छन् । उनको विगतका फिल्मले यही भन्छ । उपेन्द्रको खुबी लेखनमा बढी छ । विगतको कामले त्यही भन्छ ।
‘रामबाबुको निर्देशन र उपेन्द्रको लेखनको संयोजन नभएरै’ उक्त दुई फिल्मले बक्स अफिसमा खडेरी सामाना गर्नुपर्यो भन्ने कोणबाट पनि फिल्मवृतमा चर्चा कायमै छ ।
उपेन्द्रले एकल ‘जारी-२’ बनाउने र रामबाबु ‘कबड्डी–५’ बनाउने तयारीमा थिए । जारी-२ को छायाङ्कन आगामी वैशाखमा हुने चर्चा थियो ।
अहिले यी दुईको सम्बन्धमा नयाँ घटनाक्रम विकास भएको छ । एक-एक ठक्करपछि यी दुईको पुनर्मिलन भएको चर्चा छ ।
स्रोतका अनुसार रामबाबु र उपेन्द्रबीच पुरानो कुरा बिर्सिएर सहकार्य गर्ने ‘जेन्टलमेन’ सहमति भएको छ । सम्बन्ध अहिलेकै अवस्था यथावत् रहे जारी-२ र कबड्डी-५ मा यी दुईको सहकार्य हुने निश्चित छ ।
तर, उपेन्द्र भने सहकार्यको विषयमा बोल्न चाहँदैनन् । भन्छन्, ‘सहकार्य भए छ भने सबैलाई थाहा भइहाल्ने कुरा हो ।’
यद्यपि आफू सहकार्यका लागि सकारात्मक रहेको उनी स्वीकार्छन् । उनको यो जवाफबाट पनि दुईबीच सहकार्य प्रयास भएको अड्कल गर्न सकिन्छ ।
प्रतिक्रिया