काठमाडौं– शास्त्रमा मानव जीवनका १६ संस्कार बताइएको छ । तीनै १६ संस्कार मध्ये एक हो- विवाह संस्कार । विवाह मानिसको सबैभन्दा ठूलो निर्णय र कर्म मानिन्छ । त्यसैले मानिसहरू विवाह पश्चात् जीवनकाे दोस्रो अध्याय सुरु भएको मान्दछन् । विवाहले केवल दुई व्यक्तिलाई मात्र सम्बन्धमा गाँस्दैन यसले दुई परिवारलाई पनि जोड्छ ।

समुद्रशास्त्रमा उल्लेख गरिएअनुसार पुरुषमा केही यस्ता गुण हुन्छन्, जसबाट उनीहरू वैवाहिक जीवनमा सक्षम र सफल ठहरिन्छन् । तपाईले यस्ता गुण भएका पुरुष भेट्नुभयो भने विवाह गर्न राजी हुनुहोस् ।

पुरुषमा साहस र धैर्य हुनु आवश्यक हुन्छ । जुनसुकै परिस्थितिको पनि सामना गर्न पुरुषमा आत्मविश्वास र साहस हुनु जरुरी हुन्छ । यस्तै जस्तोसुकै आपत् पर्दा पनि नहडबडाउने धैर्यवान् पुरुष हुनु जरुरी हुन्छ ।

तपाईँले जीवनसाथी बनाउने भनेर सोचेको पुरुष मेहनती हुनु पनि जरुरी हुन्छ । आफ्नै संघर्षले सफल हुने पुरुषले नै आफ्नो जीवनसाथीलाई पनि सुख दिन सक्छन् । नकि अरूले कमाएको पैसामा धाक लगाउनेहरू ।

प्रायः पुरुषहरूले आफ्नो घरमा भएको झगडालाई साथीसँग सेयर गर्ने गर्छन् । तर समुद्रशास्त्रले यस्ता पुरुषलाई कमजोर भनेको छ । जस्तोसुकै परिस्थितिलाई पनि सही रूपमा मूल्याङ्कन गरेर आफ्नो तरिकाले चल्ने पुरुष नै जीवनसाथी बनाउन उपयुक्त हुन्छन् ।

एक राम्रो पुरुष उनै हुन्छन् जो आफ्नी पत्नीलाई सधैँ साथमा लिएर हिँड्छन् । साथै जस्तोसुकै कठिन अवस्थामा पनि आफ्नो परिवारको पक्षमा उभिने पुरुष राम्रा मानिन्छन् । यस्तै आफूभन्दा सानो र आफ्नो तल काम गर्ने व्यक्तिको सम्मान गर्ने पुरुष राम्रा मानिन्छन् । –विभिन्न एजेन्सीको सहयोगमा