नयाँ दिल्ली- भारतीय प्रवासीले विश्वभरबाट कीर्तिमानी १ खर्ब २५ अर्ब अमेरिकी डलर स्वदेश पठाएको पाइएको छ । विश्व बैंकले सार्वजनिक गरेको प्रतिवेदनमा भारतीय प्रवासीले विश्वभरबाट १ खर्ब २५ अर्ब डलर स्वदेश पठाएको जनाइएको छ ।

यससँगै भारत विश्वभरबाट सबैभन्दा धेरै रेमिट्यान्स पाउने देश बन्न पुगेको छ । यसबाट भारतीय प्रवासीले अस्ट्रेलिया, क्यानाडा, अमेरिका, बेलायतजस्ता मुलुकको समाजमा पु¥याउँदै आएको योगदान पनि स्पष्ट हुने भारतीय सञ्चार माध्यमले जनाएका छन् ।

सन् २०२३ को डिसेम्बर १८ मा प्रकाशित विश्व बैंकको आप्रवासन एवम् विकास प्रतिवेदनमा कम तथा मध्यम आय भएका मुलुकतर्फ रेमिट्यान्सको प्रवाह ६ खर्ब ६९ अर्ब डलर पुगेको जनाइएको छ । यसमध्ये भारतको हिस्सा १ खर्ब २५ अर्ब रहेको छ ।

यो दक्षिण एसियामा आउने रेमिट्यान्सको कूल हिस्साको ६६ प्रतिशत हो । अघिल्लो वर्ष भारतीय आप्रवासीले विश्वभरबाट १ खर्ब ११ अर्ब २२ करोड डलर स्वदेश पठाएका थिए ।