धरान– नेपाली जनता सडक दुर्घटनाको जोखिममा रहेको र कुनै पनि समय सडक दुर्घटनाको समाचार बन्ने अवस्था रहेको नेपाल यातायात स्वतन्त्र मजदुर सङ्गठनका अध्यक्ष भीमज्वाला राईले बताएका छन् ।

नेपाल यातायात स्वतन्त्र मजदुर संगठन धरानको १५औँ अधिवेशन उद्घाटन समारोहमा सडक सुरक्षा, चासो र हाम्रो भूमिका विषयक कार्यपत्र प्रस्तुत गर्दै अध्यक्ष राईले नेपालमा सडक दुर्घटना महामारीझैं बढिरहेको बताए ।

देशमा भइरहेको सडक दुर्घटनाको तथ्याङ्क प्रस्तुत गर्दै प्रत्येक दिन सरदर ८ जनाले सडक दुर्घटनामा ज्यान गुमाइरहेको र ४० जना नेपाली सडक दुर्घटनामा परेर घाइते हुने गरेको उनले बताए ।

माओवादी जनयुद्धताका १० वर्षमा १७ हजारको ज्यान जाँदा देशले संकटकालको सामना गर्नुपरेको स्मरण गर्दै अहिले भइरहेको सडक दुर्घटनाबाट १० वर्षमा २८ हजार ८ सयले ज्यान गुमाउने गरेको राईको दाबी छ । जनयुद्धभन्दा सडक दुर्घटना भयानक र ठूलो संकट रहेको उनले बताए ।

सडक दुर्घटनाको मूल कारण भौतिक, मानवीय, यान्त्रिक र पर्यावरणीय रहेको बताउँदै उनले सडक प्रयोगकर्ता सबैमा सचेतना फैलाउन सकिएको खण्डमा मानवीय कारणबाट हुने धेरै दुर्घटना न्यूनीकरण गर्न सकिने तर्क गरे ।