काठमाडौं – धार्मिक गतिविधिमा संलग्न भएका तीन जना ताइवानी नागरिक चीनमा पक्राउ परेका छन् । दक्षिणी चीनको गुवाङडोङ प्रान्तमा आई कुन ताओ धार्मिक अभियानमा संलग्न तीन ताइवानी नागरिक चीनमा पक्राउ परेको ताइवानी अधिकारीले जनाएका छन् ।

ताइवानका चिनियाँ मामिलासम्बन्धी अधिकारी लो वेन जियाले पक्राउ परेका तीनै जना ७० वर्ष उमेर समूहका रहेको जानकारी दिएका छन् । उनीहरुलाई जोङशाङ शहरस्थित एउटा निजी घरमा ग्रन्थ वाचन गरिरहेका बेला प्रहरीले छापा मारेर पक्राउ गरेको रेडियो फ्रि एशियाले जनाएको छ।

१९ औँ शताब्दीको अन्त्यतिर जापानी कब्जामा रहेका बेला चीनमा आई कुन ताओ नामक धार्मिक अभियान शुरु भएको बताइन्छ । चिनियाँ कम्युनिष्ट पार्टीले गैरकानुनी गोप्य समाज र धर्मान्धता फैलाउने भन्दै उक्त धार्मिक अभियानमाथि प्रतिबन्ध लगाएको छ ।