काठमाडौं – अभिनेता राजबल्लभ कोइरालाको ‘कमब्याक’ फिल्म ‘एक्टर: टेक वन’को टिजर सार्वजनिक भएको छ । १ मिनेट २० सेकेन्डको टिजरमा नायक कोइराला स्टाइलिस लुक्समा इन्ट्री दिएको दृश्य पनि अटाएको छ ।

टिजरमा शीर्ष चार कलाकारलाई नै स्थान दिइएको छ । नायक प्रदीप खड्कालाई भने विभिन्न चरित्रमा देखाइएको छ । उनी, नायिका आना शर्मा र दिव्या रायमाझी प्रेममा रहेको टिजरमा देख्न सकिन्छ । साथै, टिजरले त्रिकोणात्मक प्रेम सम्बन्धको कथा फिल्ममा रहेको पनि सङ्केत गर्छ ।

फिल्ममा राजबल्लभले प्रदीपलाई भन्छन्, ‘एक्टर ! यो मेरो स्टोरी हो । क्लाइमेक्स पनि मेरो हातमा छ ।’ यस संवादबाट प्रदीपले फिल्ममा एक्टरको भूमिका निर्वाह गरेको अनुमान लगाउन सकिन्छ ।

साथै, टिजरमा प्रदीपले ‘यो कथा मेरो हो’ संवाद बोलेका छन् । यसबाट पनि एक्टरको कथा प्रदीप केन्द्रित हो भन्ने बुझ्न सकिन्छ ।

राजन भुसालको निर्देशन रहेको यस फिल्म आगामी कार्तिक १५ अर्थात् लक्ष्मी पूजाबाट प्रदर्शनमा आउँदैछ । यसै फिल्मबाट नायक कोइराला १० वर्षपछि पर्दामा फर्कंदैछन् । नायक दिलीप रायमाझीकी छोरी दिव्याको यो डेब्यू फिल्म हो ।

यस फिल्ममा राजबल्लभ, प्रदीप, आना, दिव्यासहित दिव्यदेव र उषा रजक लगायतको अभिनय रहेको बताइएको छ । फिल्मको स्क्रिप्ट आकाश बराल र निर्देशक भुसालले संयुक्त रूपमा लेखेका हुन् ।

अदृत फिल्मस् र मोती फिल्मस्‌को संयुक्त प्रस्तुति यस फिल्मका निर्माता थमनकुमार भण्डारी हुन् । अनिश भुसाल सह-निर्माता र क्रियटीभ प्रोड्युसर मोती कार्की हुन् ।

हेर्नुहोस् टिजर :