महोत्तरी– होटल तथा पर्यटन व्यवसायी महासंघ मधेश प्रदेशले मुख्यमन्त्री सतिश कुमार सिंहलाई पर्यटकीय हव बनाउने योजनामा आफूहरू अग्रसर भएको बताएका छन ।

मधेशमा पर्यटकीय गन्तव्यको खोजी अभियान अगाडि बढिसकेको बताउँदै महासंघका अध्यक्ष हिरालाल गौतमले सरकारले साथ दिए मधेशलाई महत्त्वपूर्ण पर्यटकीय गन्तव्य बनाउने प्रतिवद्धता जनाए ।

महासंघले धनुषाको गौतम होटलमा आज आयोजना गरेको बधाई तथा शुभकामना कार्यक्रममा सहभागी हुन आएका मुख्यमन्त्री सिंहलाई पर्यटकीय गन्तव्य बनाउने योजनाहरू सुनाउँदै गौतमले मधेशमा निजी लगानीमा नै पाँच तारे होटलसम्म खुलिसकेको बताए ।

प्राकृतिकरूपमा वाह्य र आन्तरिक पर्यटकलाई आकर्षित गर्न सक्ने कयौ ठाउँहरू ओझेलमा परिरहेकोप्रति समर्थन जनाउदै शिक्षा तथा संस्कृति राज्यमन्त्री शारदादेवी थापाले पर्यटनबाट नै आर्थिक आधार तयार हुने जिकिर गरिन ।

यता पर्यटन व्यवसायीहरू र जनप्रतिनिधिहरूको योजना सुनेपछि मुख्यमन्त्री सिंहले आफ्नो कार्यकालमा प्राप्त सुझावहरूलाई कार्यान्वयन गर्ने प्रतिवद्धता जनाए ।

होटलहरु खुलेतापनी पर्यटकहरूलाई रोक्न नसकेको स्वीकार गर्दै थप व्यवस्थापनको जरुरी भएको उनको भनाई छ ।