काठमाडौं– विवाहको बहानामा एकजना नेपाली युवतीलाई चीन पुर्‍याएर बेचेको खुलेको छ ।

भारत र खाडी मुलुकहरूमा नेपाली युवतीहरू बेचिएको समाचार आइरहेका बेला अब चीनमा पनि बेच्न थालिएको खुलासा प्रहरीले गरेको हो ।

प्रहरीले एकजना युवतीलाई चीनमा लगेर बेचेको अभियोगमा उदयपुरको त्रियुगा नगरपालिका-१ जोगीदह निवासी ३१ वर्षीया सुन्दरी राईलाई मंगलबार पक्राउ गरेको छ ।

चीनस्थित नेपाली राजदूतावासको समन्वयमा एकजना नेपाली युवतीलाई यही असार ९ गते उद्धार गरिएको थियो ।

चीनबाट उद्धारपछि नेपाल फर्काइएकी ती युवतीको जाहेरीका आधारमा मानव बेचबिखन अनुसन्धान ब्यूरो काठमाडौंको सुन्दरीलाई पक्राउ गरेको हो ।

राईले पीडितलाई सामाजिक सञ्जाल म्यासेन्जरमार्फत कुराकानी गरी फकाएकी थिइन् ।

आफूले चिनियाँ नागरिकसँग विवाह गरेर चीनमा बस्न थालेको १० वर्ष भएको बताउँदै पीडित युवतीलाई उनले फकाएको खुलेको छ ।

उनले चीनमा धेरै राम्रो हुन्छ, विवाह गरेर चीनमा आउनू, विवाहका लागि तयार केटा धनी र राम्रो रहेको प्रलोभन देखाई पीडितलाई काठमाडौंको ठमेलमा बोलाएकी थिइन् ।

त्यसपछि उनले चिनियाँ युवासँग भेट गराई २०८० फागुन १० गते भिजिट भिसामा चीन पुर्‍याएकी थिइन् । त्यहाँ उनलाई सुन्दरी १ लाख ५० हजार रूपैयाँमा चिनियाँ नागरिकलाई बेचेको खुलेको छ ।

ती युवतीलाई डेढ लाखमा किनेका चिनियाँ नागरिकले घरैमा बन्धक बनाएर शारीरिक र मानसिक यातना तथा यौन शोषण गरेको पीडितले बताएकी छन् ।

राईलाई जिल्ला अदालत काठमाडौंबाट ७ दिन म्याद थप गरी कारबाही अघि बढाइएको छ। यसबारेमा अनुसन्धान जारी रहेको पनि प्रहरीले जनाएको छ ।