काठमाडौं– राष्ट्रिय स्वतन्त्र पाटीका सभापति रबि लामिछानेले जनताले परिवर्तनको कसम खाने हो भने मुलुक परिवर्तन हुने बताएका छन् । साेमबार कपिलवस्तुको जीतपुरस्थित बुद्ध रंगशालामा रास्वपाले आयोजना गरेको खुलासभालाई सम्बोधन गर्दै उनले यस्तो बताएका हुन् । 

उनले भने– ‘म शक्तिशाली जनता हुँ, दास होइन। नोकर होइन। म लोभी होइन। रक्सी–मासुमा भोट बेच्नेवाला होइन। म सचेत नागरिक हुँ भनेर कसम खान सक्नुहुन्छ? र, त्यो कसम चार वर्ष टिकाउन सक्नुहुन्छ? सक्नुहुन्छ भने यो देशमा परिवर्तन कसैले पनि रोक्न सक्दैन।’

यस्तै उनले एक कार्यकाल बहुमतको सरकार चलाएर आफूले भनेका कुरा पूरा गर्न नसके राजनीतिबाटै अलग हुने समेत बताए । 

उनले भने, ‘राम्रो गरुन्जेल घण्टी बजाउनुस्। नराम्रो गर्दा घण्टीले हामीलाई नै बजाइदिनुस्।’

कुनै षड्यन्त्रले पार्टीले यात्रा रोकियो भने पार्टी बनाउने जिम्मा जनतालाई दिने उनको भनाई छ । यस्तै उपसभापति डीपी अर्यालले देश बनाउने दायित्व रास्वपाले पूरा गर्ने दाबी गरे । जनताको आशा र अपेक्षा पूरा गर्न सधैँ इमानदार रहने र नागरिकको अहित हुने काम कहिल्यै नगर्ने उनले भने ।  

उनले भने, ‘रास्वपाविरुद्ध निरन्तर षड्यन्त्र हुन सक्नेमा पार्टी पंक्ति चनाखो हुनुपर्छ सभापति लामिछानेविरुद्धका षड्यन्त्र, लान्छना र आरोपको जनस्तरबाटै प्रतिवाद गर्नुपर्छ । ‘