काठमाडौं – भेनिस, ह्याम्बर्ग र बुसानजस्ता अन्तर्राष्ट्रिय फिल्म फेस्टिभलमा सहभागी नेपाली फिल्म ‘राजागंज’ चैत १ बाट प्रदर्शनमा आउने भएको छ । निर्माण पक्षले नेपालमा फिल्मको प्रदर्शन मिति घोषणा गरिसकेको छ ।

विदेशमा ‘पूजा सर’ शीर्षक दिएर प्रिमियर गरिएको यो फिल्म नेपालमा भने ‘राजागंज’ नाम दिएर प्रदर्शनमा ल्याउन लागिएको विज्ञप्तिमा उल्लेख छ ।

यस फिल्मको केन्द्रीय पात्र आशा मगराती हुन् । उनले पूजा थापाको भूमिका निर्वाह गरेकी छन् । महिलाप्रधान यस फिल्ममा आशासहित निकिता चण्डक, आरती मण्डल, ऋचा शर्मा, गौमाया गुरूङ, पशुपति राई, पुष्पा यादव र रिंकु गायत्री लगायतको अभिनय छ । अभिनेता दयाहाङ राई, विजय बराल, घनश्याम मिश्रा  र परमेश्वर झा लगायतले पुरुष पात्रको भूमिका निभाएका छन्‌ ।

अभिनेता दयाहाङ ‘राजागंज’ एक साहसी महिलाको कथा भएको बताउँछन् । फिल्मबारे उनी थप्छन्, ‘यो फिल्म कला र व्यवसायको उत्कृष्ट संगम हो । यसको मेकिङ, टेक्निकल लेयर्स र प्रस्तुति उच्चस्तरको छ ।’

राजागंज निर्देशक दीपक ‘नेपाली फिल्म’लाई प्रतिष्ठित अन्तर्राष्ट्रिय फिल्म फेस्टिभलमा सहभागी गराउने फिल्मकर्मी हुन् । सन् २०१२ मा उनको फिल्म ‘हाइवे’ बर्लिन फिल्म फेस्टिभल सहभागी भएको थियो । त्यसअघि कुनै पनि नेपाली फिल्म यो तहको प्रतिष्ठित अन्तर्राष्ट्रिय फेस्टिभलमा प्रदर्शन गरिएको थिएन ।

उनै निर्देशकको यस फिल्मका प्रमुख निर्माता बलिउडका सफल निर्देशक तथा निर्माता अनुराग कश्यप हुन् । उनले भेराइटी म्यागेजिनको एक अन्तर्वार्तामा यो फिल्ममा जोडिनु सौभाग्य रहेको बताएका छन्‌ ।

उनले भनेका छन्‌, ‘ह्वाइट सन हेरेदेखि म दीपकको कामको फ्यान भएको थिएँ र उनले अर्को कुन फिल्म गर्लान् भन्ने प्रतिक्षामा थिएँ ।’

अनुरागको सहभागीताले पनि यस फिल्मले चर्चा कमाएको छ । दीपक दोस्रो फिल्म ‘ह्वाइट सन’ भेनिस, टोरोन्टो, लोकान, रोटडर्याम, बुसान, सिड्नी लगायतका महोत्सवहरूमा छानिएको थियो भने सिंगापुर र पाम स्प्रिङ्ग्समा उत्कृष्ट फिल्मको अवार्डसमेत जितेको थियो ।