काठमाडौं- राष्ट्रिय प्रजातन्त्र पार्टीका प्रमुख सचेतक ज्ञानबहादुर शाहीले उपप्रधान तथा गृहमन्त्री रवि लामिछानेमाथि व्यंग्य कसेका छन् ।

आइतबार बसेको प्रतिनिधि सभाको बैठकमा सभामुखसँग समय लिएर बोल्दै उनले संसद् अहिले संसद् जस्तो हुन नसकेको पनि बताए ।

‘अहिले संसद् संसद् जस्तो भएको छैन । संसद्को दाहिनेतिर बस्दा मान्छेको चरित्र एउटा, बायाँतिर बस्दा अर्को चरित्र हुने रहेछ’, उनले गृहमन्त्रीतिर लक्षित गर्दै भने, ‘आज अहिलेसम्म पनि संसद्‍को गतिविधि अघि बढ्न सकेन । यसअघि गृहमन्त्री र प्रधानमन्त्रीले मुटु दह्रो छ भनेका थिए । तीन महिनाअघि मात्रै गृहमन्त्रीले खुट्टा कमाउनु भएन भनेको यहीँबाट हो । तर अहिले उहाँहरूको नाम आएको छ किन छानबिन नभएको हो ?’

शाहीले सहकारीपीडितहरूको सडकमा बास भएको बताउँदै उनीहरूको बचत फिर्ता हुनुपर्ने उल्लेख गरे ।

‘मकै पोलेको र सागको मुठा बेचेको पैसा हो उनीहरूको । नेपाली जनतालाई मार्न कसैले पाउँदैन’, उनले भने, ‘गृहमन्त्रीलाई मेरो प्रश्न, मुटु कमाएको हो ? खुट्टा कमाएको हो ? डराएको हो ?’

उनले सहकारी प्रकरणमा राप्रपा सांसद गीता बस्नेतलाई पक्राउ पुर्जी जारी गर्दा गृहमन्त्रीलाई जोगाइएको बताए ।

‘छिपछिपे सहकारीमा खाता खोलेकी गीता बस्नेतका ज्वाइँले कृष्णसार रेस्टुरेन्टमा लगानी गरेका छन्। यसमा प्रत्यक्ष नजोडिएकी राप्रपा सांसद गीता बस्नेतलाई पक्राउ पुर्जी जारी हुन्छ’, उनले भने, ‘तर गृहमन्त्रीको नाममा गोरखा मिडिया नेट्वर्कमा सहकारीको करोडौँ बचत आउँदा किन कारबाही हुँदैन ? सरकारमा पुग्दा एउटा बोली प्रतिपक्षमा अर्को बोली हुनु हुँदैन ।’

उनले गृहमन्त्री रवि लामिछाने जोडिएको प्रकरणमा छानबिन गर्न ढोका खोलिदिनुपर्ने बताए । ‘गृहमन्त्री तपाईंले छानबिन गर्न दिनुस् । दोषी भए कारबाही होला नभए फेरि तपाईं यहीँ आउनु हुन्छ । जनताले पुराना दलले गर्न सकेनन् भनेर नयाँ दललाई अवसर दिएको हो तर जनताको सपना मर्न दिनु भएन।’

उनले गृहमन्त्री लामिछाने जोडिएको सहकारी प्रकरणमा छानबिन समिति बनाउनै पर्ने बताए । ‘छानबिन समिति बनाउनुपर्छ, यसमा गृहमन्त्री तयार हुनुपर्छ’, उनले भने, ‘सहकारी ठगीमा छानबिन समिति चाहिन्छ ।’