काठमाडौं – पाकिस्तानको राष्ट्रिय प्रसारण संस्था रेडियो पाकिस्तानका कर्मचारी आन्दोलनमा उत्रेका छन् । आन्दोलनरत कर्मचारीले रेडियो पाकिस्तानको मुख्यालयमा तालाबन्दीसमेत गरेका छन् ।

सरकारले लामो समयदेखि आफूहरुको वास्ता नगरेको कर्मचारीको आरोप छ । सरकारले सरकारी कर्मचारीको तलब गत वर्ष २५ प्रतिशत र यस वर्ष २० प्रतिशत बढाएपनि यसबाट आफूहरु बञ्चित भएको उनीहरुको भनाइ छ ।

त्यसैगरी, लामो समयदेखि आफूहरुले पेन्सन, स्वास्थ्य सुविधा र आवास सुविधा पनि नपाएको कर्मचारीले गुनासो गरेका छन् । विगत एक वर्षदेखि आफूहरुको पदोन्नती पनि नभएको कर्मचारीको दाबी छ ।

कर्मचारीले तालाबन्दी गरेपछि रेडियो पाकिस्तानको मुख्यालयमा प्रहरी परिचालन गरिएको थियो । कर्मचारीको आन्दोलनमा प्रहरी परिचालन भएपछि अवस्था तनावग्रस्त भएको तर हिंसाका कुनै घटना भने नभएको पाकिस्तानी सञ्चार माध्यमले जनाएका छन् ।