काठमाडौं – सार्वजनिक ऋणको दलदलमा फसेको लाओसमा मुद्रास्फीति ह्वात्तै बढेको छ । मुद्रास्फीति ह्वात्तै बढेपछि साम्यवादी शासन रहेको लाओसको राजधानी भियन्टिएनका बजारमा चहलपहलमा पनि कमी आएको छ ।

एशियाली विकास बैंक एडीबीका अनुसार सन् २०२२ मा लाओसमा मुद्रास्फीति दर २३ प्रतिशत रहेको थियो । त्यसैगरी, सन् २०२३ मा मुद्रास्फीति बढेर ३१ प्रतिशत पुग्यो । यस वर्ष भने मुद्रास्फीति २५ प्रतिशत पुग्ने एडीबीको अनुमान छ ।

केही समयअघि मात्रै विश्व बैंकले लाओसको सार्वजनिक ऋण धान्ने नसकिने अवस्थामा पुगेको चेतावनी दिएको थियो । लाओसको सार्वजनिक ऋण १३ अर्ब अमेरिकी डलर पुगेको छ । जुन, त्यहाँको कुल ग्राहस्थ उत्पादनको १ सय ८ प्रतिशत हो ।

लाओसले तीव्र गतिको रेल निर्माण गर्नका लागि चीनसँग ६ अर्ब डलर ऋण लिएको छ । चीनको महत्वकांक्षी बीआरआई परियोजनाअन्तर्गत निर्माण गरिएको उक्त रेलमार्गले चीनलाई सिंगापुरसँग जोड्ने योजना छ ।

मुद्रास्फीतिसँगै घरेलु मुद्राको मूल्यमा भारी गिरावट आएको छ । यसले ऋण तिर्ने लाओसको क्षमतामा अझ ह्रास आएको जनाइएको छ । अन्तर्राष्ट्रिय समाचार संस्था एएफपीका अनुसार आगामी तीन वर्षसम्म लाओसले ऋणको ब्याजमात्रै औसतमा १ अर्ब ३० करोड डलर तिर्नुपर्ने छ ।