काठमाडौं- प्रमुख प्रतिपक्षी नेकपा माओवादी केन्द्रका अध्यक्ष पुष्पकमल दाहाल प्रचण्डले वर्तमान सरकारले ‘चाइना कार्ड’ खेल्न खोजेको आशयसहित आफूले नबोलेको बताएका छन् ।
प्रधानमन्त्री केपी शर्मा ओलीले आगामी मंसिर १७ गतेदेखि गर्न लागेको चीन भ्रमणको सन्दर्भमा आयोजना गरेको पूर्वप्रधानमन्त्री र पूर्वपरराष्ट्रमन्त्रीहरूसँगको छलफलका क्रममा प्रचण्डले यसो भनेका हुन् ।
छलफलमा पूर्वप्रधानमन्त्री प्रचण्डले आफूले विगतमा सरकारको नेतृत्व लिँदा पनि पहिलो भ्रमण चीनबाटै गरेर भारत जाने परम्परा तोडेको बताएका छन् ।
‘मैले चीन कार्ड खेल्न खोजेको भन्ने आशयले नभई मुलुककै राजनीतिक उतारचढावका विषयमा कार्ड खेल्न नहुने भनी बोलेको थिएँ’, उनले भने, ‘गत वर्ष म प्रधानमन्त्री हुँदा चीनसँग भएका सम्झौताहरूको प्रभावकारी कार्यान्वयन हुनुपर्छ।’
त्यसअघि प्रधानमन्त्री ओलीले अर्को भारतसँग पनि उस्तै मित्रवत सम्बन्ध रहेको बताउँदै दुई देशको मैत्री सम्बन्धको लाभ नेपालको आर्थिक विकासमा हुने गरी लिन सक्नुपर्ने बताएका थिए ।
उनले नेपालका कार्यकारी प्रमुखको औपचारिक भ्रमण पहिला कुन मुलुकबाट गर्ने भन्ने यहाँको आवश्यकता र निर्णयका आधारमा हुने भएकाले यस्ता विषयलाई कुनै देशविरुद्ध ‘कार्ड’ का रुपमा कसैले लिन नहुने आग्रह गरेका थिए । त्यही सन्दर्भमा प्रचण्डले ‘चाइना कार्ड’बारे यस्तो जवाफ दिएका हुन् ।
प्रचण्डले प्रधानमन्त्री ओलीको चीन भ्रमणका सन्दर्भमा भारतीय पत्रिका हिन्दुमा यही कात्तिक २९ गते दिएको अन्तर्वार्तामा विवादित टिप्पणी गरेका थिए ।
त्यस अन्तर्वार्तामा प्रचण्डले प्रधानमन्त्री ओलीले ‘चाइना कार्ड’ खेलिरहेको आरोप लगाएका थिए । अन्तर्वार्तामा प्रचण्डले नयाँ सरकारको नीतिका कारण नेपाल-भारत सम्बन्ध तनावमा रहेको टिप्पणीसमेत गरेका थिए । सीमा विवाद फेरि ब्युँतिने खतरा रहेकोसमेत उनले भन्न भ्याएका थिए ।
प्रचण्डले असारमा सरकारबाट बिदा हुनुअघि १८ महिने कार्यकालमा नेपाल-भारत सम्बन्धलाई ‘नयाँ उचाइ’मा पुर्याएको जिकिर गरेका थिए । तर उनले ओलीमाथि ‘चाइना कार्ड’ खेलेको गम्भीर आरोप पनि लगाएका थिए ।
द हिन्दुले प्रधानमन्त्री ओली बेइजिङ जाने सन्दर्भमा भारतले भ्रमणको निम्ता नदिएको प्रसंगसहित सोधेको प्रश्नमा प्रचण्डले ओलीबाट ‘चाइना कार्ड’ खेल्ने काम भएको बताएका थिए ।
‘यो प्रधानमन्त्री ओली नेतृत्वको वर्तमान सरकारको अपरिपक्वताको उदाहरण हो । उनीहरूले दुवै छिमेकीसँगको सम्बन्धमा न्यूनतम् परिपक्वता देखाउनुपर्थ्यो। केपीजी चीन जाँदैहुनुहुन्छ, तर यो भ्रमण बढी ‘चाइना कार्ड’ खेल्न मात्र भएको देखिन्छ, जुन गलत हो’, उनले उक्त अन्तर्वार्ता भनेका थिए, ‘हाम्रो इतिहास, संस्कृति र भूगोलले दुई छिमेकीसँगको सम्बन्धलाई सन्तुलित राख्नुपर्छ भन्ने देखाउँछ । ओलीजीले चीन जानुअघि भारतसँग नेपालको विशेष सम्बन्धलाई स्वीकार्नुपर्छ। तर यस्तो नहुनु पर्ने थियो ।’
प्रतिक्रिया