काठमाडौं – आगामी साउन २५ गतेबाट प्रदर्शनमा आउने फिल्म ‘नम्बरी सुन’को ट्रेलर सार्वजनिक भएको छ ।

काठमाडौंमा बुधबार एक कार्यक्रमबीच सार्वजनिक गरिएको ट्रेलरमा प्रेम र द्वन्द्वलाई स्थान दिइएको छ । फिल्ममा उच्च र तल्लो वर्गका बीचको प्रेम र त्यसले निम्त्याउने घटना आधारित कथा रहेको ट्रेलरले प्रष्ट पार्छ ।

ट्रेलरमा अभिनेता सरोज खनाल गाउँको कडा स्वभावको मुखियाको भूमिका देखिएका छन् । नायिका नम्रता सापकोटाले उच्च वर्ग र नायक गौरव पहाडी तल्लो वर्गको प्रतिनिधित्व गरेको ट्रेलरले खुलाउँछ ।

राजु गिरी निर्देशन रहेको यस फिल्मको प्रस्तुतकर्ता नारायण खाती हुन् । फिल्ममा गौरव पहारी, नम्रता सापकोटा, विनोद न्यौपाने, सरोज खनाल, बुद्धि तामाङ, राजाराम पौडेल, किरण नेपाली, राजेन्द्र खड्गीलगायतको अभिनय छ ।

सरोज खाती, सविन खाती र मनोज रिजाल निर्माता रहेको यस फिल्ममा शिवम् अधिकारीको पटकथा तथा संवाद रहेको छ ।