काठमाडौं– चलचित्र ‘महाजात्रा’ हेर्न नेकपा एमालेको टोली सिनेमा घरमा पुगेको छ । एमाले अध्यक्ष केपी शर्मा ओलीसहितको टोली सोमबार सुन्धारास्थित सीटीसी सेन्टरमा पुगेको हो । 

अध्यक्ष ओलीको श्रीमती राधिका शाक्य, उपाध्यक्ष ईश्वर पोखरेल, प्रदीप ज्ञवाली, शंखर पोखरेल, कोमल ओलीसहितको ४० जना नेताको टोलीले बेलुका साढे ५ बजेको शो हेरेको हो । 

फिल्म निर्माण पक्षका अनुसार उनीहरु आफैँले फिल्म हेर्ने प्रबन्ध मिलाएर पुगेका हुन् । प्रदर्शनको चौथो दिन ओली एमाले नेताको टोली लिएर पुगेका हुन् । 

फिल्म प्रदर्शनमा आएको दिन निर्माण पक्षलाई शुभकामना दिँदै ओलीले आफू पनि हेर्न आउने प्रतिबद्धता जनाएका थिए । 

आपतकालीन अवस्थामा फेला परेको पैसालाई व्यवस्थापन गर्न आइपर्ने समस्यालाई फिल्ममा रोचक ढंगले देखाइएको छ । फिल्मको कथामा भ्रष्ट नेता भूमिका पनि समावेश छ । अर्थात् कमेडी जनरामा बनेको फिल्मले राजनीतिलाई पनि छोएको छ । 

प्रदीप भट्टराईको लेखन र निर्देशन रहेको यस फिल्ममा हरिवंश आचार्य, राजाराम पौडेल, विपिन कार्की, रविन्द्रसिंह बानियाँ, रवीन्द्र झा, दिव्यदेव, वर्षा राउत, गौमाया गुरुङलगायतको मुख्य भूमिका रहेको छ । 

फिल्मले सुरुवाती दिनदेखि नै राम्रो व्यापार र चर्चा कमाएको छ । सुरुवाती तीन दिनमा फिल्मले स्वदेशमा मात्रै ४ करोड २५ लाखको व्यापार गरेको निर्माण पक्षको दाबी छ ।