काठमाडौँ– प्रदीप भट्टराईको निर्देशन रहेको फिल्म ‘महाजात्रा’ले सुरुवाती तीन दिनमा चार करोड २५ लाखको व्यापार गरेको छ ।

निर्माण पक्षका अनुसार यस फिल्मले पहिलो दिन शुक्रबार नै एक करोड २३ लाख, दोस्रो दिन १ करोड ८२ लाख र तेस्रो दिन १ करोड २० लाखको व्यापार गरेको हो ।

‘जात्रा’को तेस्रो शृङ्खलाका रुपमा निर्माण गरिएको यस फिल्मलाई दर्शकले पहिला जस्तै माया दिएको निर्देशक तथा लेखक भट्टराईको बुझाइ छ ।

उनी भन्छन्, ‘हामी प्रदर्शनकै दिनदेखि हलमा पुगेर दर्शकसँग साक्षात्कार गरिरहेका छौँ । उहाँहरू मनोरञ्जनसँगै फिल्ममा उठान गरिएको राजनीतिक विषयसँग खुसी हुनुहुन्छ । फिल्म हेर्न हलसम्म परिवार नै आइरहनु भएको छ ।’

यही चैत ९ गतेदेखि नेपालका साथै विश्वभर एकसाथ प्रदर्शन भइरहेको फिल्म हेर्न हलमा दर्शकको भिडभाड देखिएको छ । फिल्मले दर्शकबाट सकारात्मक ‘वर्ड अफ माउथ’ पाउन सफल भएको छ ।

आपतकालीन रुपमा आइपर्ने पैसा व्यवस्थापन गर्ने अवसर र त्यसले निम्त्याउने समस्यालाई रोचक शैलीमा प्रस्तुत गरिएको ‘महाजात्रा’मा हरिवंश आचार्य, विपिन कार्की, रविन्द्रसिंह बानियाँ, वर्षा राउत, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर बाङ्देल, गौमाया गुरुङ, अरविन खड्का लगायतको अभिनय रहेको छ । फिल्ममा म्याक्स दीपेश खत्री र यज्ञश्वर पौडेल निर्माता छन् ।