काठमाडौं – भारतीय प्रधानमन्त्री नरेन्द्र मोदीले आफ्नो मुलुक दिगो विकासमा प्रतिबद्ध रहेको जनाएका छन् । ब्राजिलको रियो डे जेनेरोमा आयोजित जी २० शिखर सम्मेलनका क्रममा प्रधानमन्त्री मोदीले आफ्नो मुलुक दिगो विकासप्रति प्रतिबद्ध रहेको जनाएका हुन् ।

जी २० को दिगो विकास र ऊर्जा संक्रमणसम्बन्धी कार्यक्रममा भारतले दिगो विकासका लागि आवास, जलस्रोत, ऊर्जा र सरसफाइका क्षेत्रमा पहल गरिरहेको उल्लेख गरे । प्रधानमन्त्री मोदीले पेरिस जलवायु सम्झौतामा उल्लेखित लक्ष्य प्राप्त गर्ने दिशातर्फ भारत लागिरहेको समेत जानकारी दिए ।

भारतीय समाचार संस्था एएनआईका अनुुसार उनले भारतले दिगो विकासलाई बढावा दिन ‘ग्लोबल साउथ’ का मुलुकहरुसँग सहकार्य गरिरहेको बताए । जी २० सम्मेलनका क्रममा प्रधानमन्त्री मोदीले ब्राजिल, दक्षिण कोरिया, अमेरिका, इजिप्टलगायत मुलुकका शीर्ष नेताहरुसँग भेटवार्ता समेत गरेका थिए ।