काठमाडौं- सन् २०२४ मा सबैभन्दा बढी ग्रस केलेक्सनको कीर्तिमान राखेको तेलगु फिल्म ‘कल्की २८९८ एडी’को दोस्रो श्रृङ्खला बन्ने भएको छ ।

गोवामा आयोजित भारतीय अन्तर्राष्ट्रिय फिल्म महोत्सव ‘आईएफएफआई’मा पत्रकारहरूसँगको कुराकानीमा निर्माताद्वय स्वप्ना दत्त र प्रियंका दत्तले ‘कल्की २८९८ एडी– २’ बन्ने खुलासा गरेका हुन् ।

कल्की–२ को ३० प्रतिशतभन्दा बढीको छायाङ्नक भइसकेको स्वपनाको भनाइ छ । उनका अनुसार पहिलो श्रृङ्खलाको छायाङ्कनकै दौरान दोस्रोका लागि पनि केही अंश खिचिएको हो ।

सन् २०२५ को सुरुवाती तीन महिनाभित्र दोस्रो श्रृङ्खलाको छायाङ्नकमा सुटिङ युनिट निस्कने स्वप्नाको दाबी छ । भनिन्, ‘हामीले तारिख तय गरेको छैनौँ । यसबारे छिट्टै टुंगो लगाएर सार्वजनिक गर्नेछौं ।’

स्वप्नाले फिल्ममा दीपिका पादुकोण भूमिकाबारे समेत केही खुलासा गरेकी छन् । पहिलो श्रृङ्खलामा गर्भवतीको भूमिकामा देखिएकी दीपिका दोस्रो श्रृङ्खलामा आमाको भूमिकामा देखिने उनको भनाइ छ ।

दत्तले भनेकी छन्, ‘दोस्रो श्रृङ्खलामा दीपिकालाई कुनै अंशमा आमाको भूमिकामा देख्न सकिन्छ ।’ सुत्केरी बिदाका पछिको दीपिकाको यो पहिलो फिल्म हुन सक्ने उनको संकेत छ ।

गत जुन २७ मा प्रदर्शनमा आएको यस ‘कल्की २८९८ एडी’ मा प्रभास, अमिताभ बच्चन, दीपिकाको मुख्य भूमिका रहेको छ । फिल्मको निर्देशन र लेखन नाग आश्विनले गरेका हुन् ।