काठमाडौं – फोहरको थुप्रोमा खानेकुरा बनाएको भेटिएपछि ललितपुरस्थित रोयल एलिनाज बेकरी क्याफेलाई  अनुगमन निकायले २० हजार रुपैयाँ जरिवाना तिराएको छ ।

खाद्य सामग्री फोहरमाथि राखेर सर्वसाधारणको स्वास्थ्यमा गम्भीर हेलचेक्य्राइँ गरेको भन्दै सो क्याफेलाई जिल्ला प्रशासन कार्यालय, उद्योग वाणिज्य कार्यालय, आन्तरिक राजस्व कार्यालय लगायत निकायले  जरिवाना भराएको हो ।

सरकारी उच्चस्तरीय संयुक्त अनुगमन टोलीले मंगलबार सो क्याफेको अनुगमन गरेको थियो । सो क्याफेले न्युनतम मापदण्ड नै मिचेको पाइएकोउद्योग वाणिज्य कार्यालय ललितपुरका अनुगमन अधिकृत सञ्जय थापाले जानकारी दिए ।

थापाका अनुसार; क्याफेको खाद्यपदार्थ फोहर राख्ने डस्टबिनसँगै जोडेर राखिएको भेटिएको थियो । ‘मानिसको जीवनसँग जोडिएको खानेकुरा फोहरमैला भएकै ठाउँमा राखेर गम्भीर लापरबाही गरेको पाइएपछि संयुक्त बजार अनुगमन टोलीले जरिवाना गरेको हो,’ थापाले भने, ‘२५ रुपैयाँ पर्ने बोतलको पिउने पानीलाई ५० रुपैयाँमा बेचेर ठगी गरेको भेटियो ।’

बजार अनुगमन टोलीले मानभवनमा रहेको जोइन्ट बार एन्ड ग्रीललाई पनि १० हजार रुपैयाँ जरिवाना तिराएको छ । ३५ रुपैयाँको बोतलको प्रशोधित पिउने पानीलाई १०० रुपैयाँमा बेचेको भेटिएपछि कारबाही गरेको अनुगमन अधिकृत थापाले जानकारी दिए ।

दर्ता प्रमाणपत्र, प्यान र भ्याटमा दर्ता भएको प्रमाणपत्र नै नभेटिएको तथा सामान्य विलबिजक पनि जारी नगरेको पाइएको विभागले जनाएको छ ।

‘जोइन्ट ग्रीलले आन्तरिक राजस्वको अन्तःशुल्क प्रमाणपत्र नलिइ अल्कोहल जन्य पेय पदार्थ विक्रीवितरण गरेको भेटियो’, थापाले थपे, ‘उसको रक्सी पसल सिल गरिएको छ ।’ दर्ता नगरेसम्म अब विक्रीवितरण पुर्ण रूपमा रोक लगाइएको उनले बताए ।

अनुगमन टोलीले सोमबारदेखि  बजार अनुगमन थालेको हो । दशैँभर अनुगमन जारी रहने सरकारी अधिकारीहरूले बताएका छन्‌ ।