काठमाडौं– आदर्श मिश्रा उदाउँदै गरेका हास्यकालाकार हुन् । उनी बारा जितपुरका युवा हुन् । उनका स्वर्गीय बुबा नेपाली भए पनि आमा भारतीय मूलकी हुन् । जुन मधेसका लागि सामान्य कुरा हो ।

आदर्श स्ट्याण्ड अप कमेडी हुँदै कलाकारिता क्षेत्रमा आफूलाई प्रमाणित गर्दैछन् । उनी कमेडी च्याम्पियन पहिलो सिजनको उत्कृष्ट ६ प्रतिस्पर्धी पनि हुन् । आफ्ना कन्टेन्टसँगै उनले साम्प्रदायिक विभेदको आवाज पनि उठाउँदै आएका छन् ।

उनको दाबीअनुसार राजनीतिमा मात्रै होइन, कलाकारिता क्षेत्रमा पनि ‘टोपी र धोती’ को विषय हाबी छ । उनले मधेशी भएकै कारण आफूले विभेद भोगेको घटना पनि सार्वजनिक गरिरहेका हुन्छन् ।

• फागुन ३ बाट कमेडी च्याम्पियनको तेस्रो सिजन, फर्म्याट फेरिने

कमेडी च्याम्पियनकै दौरान उनले निर्णायक सन्तोष पन्तबाट विभेद भोगेको कुरा एक पटक चर्चामा आएको थियो । उनले भनेका थिए– सन्तोष पन्तजस्तो ‘रेसिस्ट’ मान्छे मैले देखेको छैन । यसलाई पानीपुरी बेच्ने पात्र दिनुपर्ने किन लाहुरेको दिएको हो ।

आदर्शको दाबीअनुसार केमेडी च्याम्पियनमा नेपाल आर्मीको पात्र भूमिका निर्वाह गर्दा सन्तोष पन्तले ‘अफ रेकर्ड’ सो साप्रदायिक विभेद बोकेको शब्द प्रयोग गरेका हुन् । जुन कुराको सन्तोष पन्त अस्वीकार गर्दै स्पष्टीकरण दिएका छन् ।

बाहिर आवरणमा लगाएको आरोपको जड फरक भएको उनले आदर्शकै अगाडि स्पष्ट पारेका छन् । कमेडी च्याम्पियनको सिजन–३ को घोषणा गर्न दरबारमार्गका आयोजित कार्यक्रममा सन्तोषले प्रतियोगिताबाट बाहिरएको आवेगको सो आरोप लगाएको हुनसक्ने आशंका व्यक्त गरे ।

‘विवादको जड कुरा के हो त ?’ भन्ने खबरहबको प्रश्नमा सन्तोषको जवाफ थियो, ‘रिसाएका बेला बाहुनले राम्रोसँग पढ्दैन भनेकोजस्तै हो । प्रतियोगिताबाट बाहिरिएर उहाँलाई रिस उठेको होला । तर मैले भेदभाव कहिल्यै पनि गरेको छैन ।’

पन्तले थपे, ‘उहाँले नेपाली सेनाको पोसाक लगाएर लाहुरे हुँ भन्दै हुनुहुन्थ्यो । लाहुरे र नेपाली सेनाको फरक बुझ्न मैले सम्झाएको थिएँ । कमेडी गर्न बुझ्नुपर्छ, जे नि बोल्नुहुँदैन भनेको थिएँ, त्यसैको असर होला ।’

सो कार्यक्रममा आदर्श पनि उपस्थित थिए । यही प्रश्नपछि उनले प्रतियोगिता बारेमा प्रश्न राखे, तर सन्तोषको जवाफको कुनै प्रतिवाद गरेनन् ।