काठमाडौं – भारतीय ध्वजावाहक हवाइ सेवा कम्पनी एअर इण्डियाका प्रमुख कार्यकारीले अस्ट्रेलियाको ब्रिसबेनमा आफ्नो सेवा विस्तार गर्ने बताएका छन् ।

ब्रिसबेनमा आयोजित हवाइ उद्योगका प्रतिनिधिको सम्मेलनका क्रममा एअर इण्डियाका प्रमुख कार्यकारी अधिकृत क्याम्पबेल विलसनले आफ्नो कम्पनी चाँडै नै विश्वस्तरीय हुने दाबी गरे ।

दुई वर्षअघि निजीकरण भएसँगै एअर इण्डियाले कीर्तिमानी ४ सय ७० वटा नयाँ जहाज खरिद गर्ने तयारी गरेको छ ।

ब्रिसबेनमा एअर इण्डियाको हवाइ सेवा विस्तार ती जहाजको आपूर्ति हुने समयले निर्धारण गर्ने द अस्ट्रेलिया टुडेले जनाएको छ । पछिल्लो समय कम्पनीले दिने सेवा र सेवाग्राहीको अनुभवलाई पनि परिष्कृत गर्दै लगेको क्याम्पबेलको भनाइ छ ।

हाल भारत र ब्रिसबेनबीच प्रत्यक्ष हवाइ सम्पर्क छैन । तर, एअर इण्डियाले ब्रिसबेनमा उडान विस्तार गरे त्यहाँको पर्यटन क्षेत्रमा ठूलो सहयोग पुग्ने अपेक्षा गरिएको छ ।

क्विन्सल्याण्डका पर्यटनमन्त्री माइकल हेलेले भारत राज्यको आठौँ ठूलो पर्यटन बजार रहेको जानकारी दिँदै भारतमा मध्यमवर्गको विस्तारसँगै भारतीय पर्यटकको आगमनमा पनि वृद्धि हुने विश्वास व्यक्त गरे ।