साना- अमेरिकी सेनाले यमनको राजधानी सनास्थित हुती विद्रोहीको अखडामा हवाई हमला गरेको छ ।

अमेरिकाले हवाई हमला गरेका अखडामध्ये हुतीले कमान्ड सुविधा दिने र मिसाइल राख्ने स्थान रहेका छन् ।

अमेरिकी सेन्ट्रल कमान्डका अनुसार लाल सागरमा हुती विद्रोहीका कयौँ ड्रोन र एक एन्टी-सिप क्रुज मिसाइललाई पनि खसालिएको छ।

अमेरिकाले यो हमला इजरायलमा हुती विद्रोहीको हमलापछि गरेको हो । हुती विद्रोहीले शनिशार इजरायलको तेल अभिभमा एक ब्यालिस्टिक मिसाइलबाट हमला गरेको थियो । जसमा दर्जनभन्दा धेरै मानिस घाइते भएका थिए ।

हुती इरान समर्थित विद्रोही समूह हो । जसको यमनको उत्तर-पश्चिम इलाकामा पकड छ ।

अक्टोबर २०२३ मा गाजामा युद्धको शुरुवातपछि हुतीले इजयराल र अन्तरराष्ट्रिय मालवाहक जहाजमा हमला थालेको थियो । हुती विद्रोहीले आफूहरू प्यालेस्टाइनको पक्षमा लडिरहेको जनाएको छ ।