बेइजिङ- चीनमा इसाई गिर्जाघरका एक जना पादरीलाई १४ वर्षको जेल सजाय सुनाइएको छ । चीनको गान्जिङ्झी जिल्ला जनअदालतले डालियनका पादरी कान सियाओङलाई १४ वर्षको जेल सजाय सुनाएको हो ।

उनीसँगै अदालतले उनकी श्रीमती वाङ फेङयीङलाई पनि चार वर्षको कारावास सजाय सुनाएको छ । त्यसैगरी, उनका साझेदार चु सिन्युलाई १० वर्ष र अन्य तीन सहकर्मीलाई समान तीन वर्षको सजाय तोकिएको छ ।

अवैध व्यवसायिक अभ्यास गरेको आरोपमा उनीहरुलाई यस्तो सजाय दिइएको बिटर विन्टरले उल्लेख गरेको छ ।

राष्ट्रपति सी जिन्पिङको कार्यकालमा चीनमा धार्मिक संगठनहरुप्रति अनुदार व्यवहार हुने गरेको आरोप लागिरहेको बेला पछिल्लो घटना सार्वजनिक भएको हो । चीनले सरकार सञ्चालित ‘तीन आत्म चर्च’ मा संलग्न नहुने सबै प्रोटेस्टेन्ट चर्चहरुमाथि दमन गर्ने गरेको आलोचकहरु बताउँछन् ।