काठमाडौं– अनन्तश्री ब्रह्माण्डीय महायज्ञ–२०८० फाल्गुनको ९ गतेदेखि सर्वसिद्धीधाम पञ्चकोट, बागलुङमा हुने भएको छ ।

अनन्तश्री ब्रह्माण्डीय महायज्ञ मूल समारोह समितिले सोमबार काठमाडौंमा पत्रकार सम्मेलन गर्दै पञ्चकोटमा फाल्गुन ९ गतेदेखि २३ गतेसम्म १५ दिवसीय महायज्ञ आयोजना गरिएको जानकारी दिएको हो ।

महायज्ञको २५ फिट अग्लो धान्यामौलोमा २१ हजार ५ सय ५५ जना श्रद्धालु भक्तजनहरूबाट २१ हजार ५ सय ५५ क्विन्टल धान अर्पण गरी धान्याचल हुने आयोजकले जनाएको छ ।

त्यस्तै महायज्ञका क्रममा राष्ट्रसम्मुनती, विश्वशान्ति र वैयक्तिक कार्य सिद्धिको सङ्कल्पका विभिन्न कार्यक्रमका साथै सम्मेलनको आयोजना हुने स्वामी कमल नयनाचार्यले जानकारी दिए ।

ब्रह्माण्डका समस्या देवी देवता नदी तीर्थहरूलाई कलशमा आह्वान गरी पूजा आराधना गरिने भएका कारण महायज्ञलाई अनन्तश्री ब्रह्माण्डीय भनिएको आयोजकले जनाएको छ ।