काठमाडौं- मकवानपुरको इन्द्रसरोबर गाउँपालिका–३, सिस्नेरीस्थित वत्सलादेवी माध्यमिक विद्यालयका बाल फुटबल खेलाडीका पीडित परिवारले अखिल नेपाल फुटबल संघ (एन्फा) को कार्यालय घेरेका छन् ।
गत असोज १२ गते बाढी-पहिरोमा परी निधन भएका ६ फुटबलरका अभिभावकहरूले बिहिबार एन्फा घेराउ गरेका हुन् ।
एन्फा एकेडेमीका किशोर फुटबलरका परिवार र आफन्तले एन्फा कम्प्लेक्समा विरोध प्रदर्शन गर्दा केहीबेर तनाव भएको छ ।
उनीहरूले किशोर फुटबलरको ज्यान गएको घटनाको छानबिन गर्न सरकारले छानबिन समिति बनाउनुपर्ने माग गरेका छन् ।
त्यहाँ आन्दोलनका क्रममा प्रहरीले हस्तक्षेप गरेपछि केहीबेर झडप भएको थियो । कतिपय अभिभावकलाई प्रहरीले दुर्व्यवहार र लछारपछार पनि गरेको छ। प्रहरीले पीडित परिवारका उनीहरू गेटमा छिर्नबाट रोकेको थियो ।
यसअघि एन्फाले पीडित परिवारलाई आठ लाख रुपैयाँ राहत दिने घोषणा गरेको थियो। तर पीडित परिवारले आर्थिक सहयोग साथै घटनाको वास्तविकता सार्वजनिक गरी कारबाही पनि माग गरेका छन् ।
यसअघि गत कात्तिक ९ गते पीडित परिवारले प्रधानमन्त्री केपी शर्मा ओलीलाई बालुवाटार पुगेर गुहारेका थिए । त्यसबेला उनीहरूले घटनाको उच्चस्तरीय आयोगबाट छानबिन गरी दोषीलाई कारबाही गर्न माग गरेका थिए ।
एन्फाद्वारा सञ्चालित उक्त विद्यालयको होस्टेलका ६ जना किशोर फुटबलरको बाढीबाट बच्न भाग्ने क्रममा गत असोज १२ गते निधन भएको थियो ।
पीडित परिवारले अघिल्लो दिनदेखि नै वर्षा आइरहेको र कुलेखानी ड्याम खोल्ने सूचना भएको अवस्थामा किशोर फुटबलरलाई विद्यालयबाट सुरक्षित स्थानमा सार्नुपर्नेमा लापरबाही भएकाले निष्पक्ष छानिबन गरी दोषीलाई कारबाही गर्न माग गरेका थिए ।
प्रतिक्रिया