काठमाडौं – पाकिस्तानमा दैनिक उपभोग्य वस्तुको मूल्यमा उच्च वृद्धि देखिएको छ । सरकारले मूल्यवृद्धि नियन्त्रण गर्ने प्रतिबद्धता जनाएपनि पाकिस्तानको रावलपिण्डी शहरमा अत्यावश्यक वस्तुको मूल्यमा उच्च वृद्धि देखिएको हो ।

पाकिस्तानबाट प्रकाशित हुने एक्सप्रेस ट्रिब्युनका अनुसार रावलपिण्डीमा कालो मुग दालको मूल्य ६ सय रुपैयाँ प्रतिकिलो पुगेको छ । त्यसैगरी, चनाको दालको मूल्य ४ सय रुपैयाँ प्रतिकिलो, खानेतेलको भाउ ५ सय २० रुपैयाँ प्रतिलिटिर पुगेको छ भने एक कार्टुन घिउको भाउ १५ सय रुपैयाँले वृद्धि भएको छ ।

मसलाको मूल्यमा ५० प्रतिशतको वृद्धि देखिएको छ । रावलपिण्डीमा एक किलो कुखुराको मासु ६ सय ५० रुपैयाँ पुगेको छ । एक दर्जन अण्डाको मूल्य ३ सय ३० रुपैयाँ पुगेको छ । त्यसैगरी, उक्त शहरमा दूधको मूल्य २ सय २० रुपैयाँ प्रतिलिट पुगेको छ ।

ट्रिब्युनका अनुसार दही एक किलोको २ सय ४० रुपैयाँ पर्छ । दैनिक उपभोग्य वस्तुको मूल्य उच्च भएपछि सो शहरमा बसोबास गर्ने निम्न र मध्यम वर्गका मानिसहरु मारमा परेका छन् ।