काठमाडौं- यती इन्टरनेसनल नेपाली फिल्म अवार्ड २०२४ (इन्फा) मा अनमोल केसी सर्वोत्कृष्ट नायक र केकी अधिकारी सर्वोत्कृष्ट नायिका घोषित भएका छन् । बेलायतको लण्डनमा शनिबार साँझ उनीहरुलाई अवार्ड वितरण गरिएको हो ।

अनमोलले फिल्म ‘फर्की फर्की’बाट र केकीले ‘प्रसाद-२’बाट सो अवार्ड जितेका हुन् । प्रसाद-२ बाटै अर्पण थापाले सर्वोत्कृष्ट खलपात्रको अवार्ड जितेका छन् ।

त्यस्तै, लाइफटाइम एचिभमेन्ट अवार्डबाट भुवन केसी सम्मानित भएका छन् ।

‘जारी’लाई सर्वोत्कृष्ट फिल्म घोषणा गरिएको छ । यही फिल्मबाट दयाहाङ राईले पप्पुलर अभिनेता र मिरुना मगरले पप्पुलर अभिनेतृको आवार्ड पाएका छन् । यही फिल्मबाट उपेन्द्र सुब्बाले सर्वोत्कृष्ट निर्देशकको अवार्ड जितेका छन् ।

सर्वोत्कृष्ट कथा-पटकथाको अवार्ड ‘दिमाग खराब’बाट आकाश बरालले हात पारेका छन् ।

सर्वोत्कृष्ट अभिनेता जुरीतर्फ फिल्म ‘पुजार सार्की’का नायका प्रदीप खड्का घोषित भएका छन् । त्यस्तै, सर्वोत्कृष्ट अभिनेतृ जुरीतर्फ ‘बोक्सीको घर’बाट सुपला सापकोटाले जितेकी छन् ।

पब्लिक च्वाईसतर्फ सर्वोत्कृष्ट अभिनेता र अभिनेतृ पल शाह र जसिता गुरुङ ठहर भएका छन् ।

त्यस्तै, फिल्म ‘बोक्सीको घर’को ‘बुझिनँ मैले’ गीतबाट प्रकाश सपुतले सर्वोत्कृष्ट संगीतकार अर्वाड जितेका छन् । ‘जारी’ फिल्मको गीत ‘चरी बस्यो’बाट कालिप्रसाद बास्कोटा र फिल्म बोक्सीको घरको बुझिनँ मैले गीतबाट समीक्षा अधिकारी सर्वोत्कृष्ट पाश्र्वगायक-गायिका ठहर भएका छन् ।