काठमाडौं – असोज १७ गते अर्थात घटस्थापनाबाट प्रदर्शनमा आउने फिल्म ‘बेहुली फ्रम मेघौली’को नयाँ गीत ‘छड्के सलाम’ सार्वजनिक भएको छ । ठमेलस्थित एक फिल्म हलमा शुक्रबार एक कार्यक्रमको आयोजना गरी औपचारिक रुपमा गीत सार्वजनिक गरिएको हो ।

विवाहको सेटअपमा तयार पारिएको गीतमा मुख्य कलाकार निश्चल बस्नेत, स्वस्तिमा खड्का, सिमरन खड्का, विजय बराल र बसुन्धरा भुषाल लगायतका कलाकारलाई फिचर्ड गरिएको छ । गीतमा प्रदीप लामा र केवीका खत्रीको कोरियोग्राफी हेर्न सकिन्छ ।

जयन जे वाइवाको संगीत निर्देशन र शब्द रचना रहेको गीतमा कालीप्रसाद बास्कोटा र बबिना किराँतीको स्वर छ । ब्ल्याक हर्स पिक्चर्स र मेघौली फिल्मस्को ब्यानरमा निर्माण भएको यस फिल्ममा साजन काफ्ले र आकाश बरालको संयुक्त लेखन र निर्देशन रहेको छ । यो उनीहरुको डेब्यू निर्देशकीय फिल्म हो ।

फिल्ममा निश्चल र स्वस्तिमासहित बसुन्धरा भुसाल, विजय बराल, सिमरन खड्का, लोकेन्द्र लेखक, रक्षा थापा, लुनिभा तुलाधरलगायतको अभिनय रहेको छ । अभिनेत्री स्वस्तिमा खड्कालाई निर्माणमा उनका श्रीमान् निश्चल बस्नेतले सघाएका छन् । कार्यकारी निर्माता फिरोज खड्का र शंकर पाण्डे हुन् ।