काठमाडौं- कलाकार, निर्देशक तथा निर्माता दीपकराज गिरी सामाजिक सञ्जालमा गर्ने हरेक पोष्टका कारण चर्चामा आइरहन्छन् ।

यस पटक पनि उनले शुक्रबार गरेको एउटा पोस्टका कारण चर्चा बटुलेका छन् । उनले सामाजिक सञ्जालमा आफूलाई महानायक नभन्न आग्रह गरेका छन् ।

छक्कापञ्जा ५ रिलिज हुँदा बहिष्कार अभियान नै खेपेका उनले अब महानायक भनेर सम्बोधन गरेमा फेसबुकमा ब्लक गरिदिने चेतावनी दिएका हुन् ।

गिरीले आफूले कहिल्लै पनि यो पद दाबी नगरेको बताउँदै आफूलाई त्यसो भनेर सम्बोधन नगर्न आग्रह गरेका हुन् ।

उनले भनेका छन्-

…अर्को सानो जानकारी गराउँदैछु, आजबाट जस-जसले मलाई महानायक सम्बोधन गर्नुहुन्छ, उहॉलाई मेरो फेसबुकमा ब्लक गर्दैछू, यो पद न मैले कहिले दाबी गरेको थिएँ न गर्नेछु । तर मैले बारम्बारभन्दा पनि भेडापन्थी देखाउने मानिस कमसेकम मेरो फेसबुकमा जोडिन सक्दैन । …फरक विचार स्वागत, असभ्यता अस्वीकार, शुभदिन !