काठमाडौं- जुद्ध शालिकदेखि इन्द्रचोकसम्मको फुटपाथ विस्तार अभियान अझै जारी छ ।

काठमाडौं महानगरपालिका र सडक विभागबीच लामो जुहारीपछि अदालतको आदेशमा फुटपाथ विस्तारले गति लिएको थियो ।

यस्तोमा महानगरले सडक घटाएर फुटपाथ विस्तारलाई निरन्तरता दिइरहेको छ । त्यहीक्रममा न्यूरोडस्थित जुद्ध शालिकदेखि इन्द्रचोकसम्मको फुटपाथ ढाकेका बिजुलीका पोल पनि हटाइँदैछ ।

महानगरले बिजुलीका ठूला पोलसहित त्यहाँ असरल्ल झुन्डिएका तार पनि हटाएर व्यवस्थापन गरिरहेको छ। पोल र तार हटाइएपछि जुद्ध शालिकदेखि इन्द्रचोसम्मको क्षेत्र सफा देखिन थालेको छ ।

महानगरले त्यस क्षेत्रबाट इन्टरनेटका तारसमेत व्यवस्थापन गरिरहेको छ । अहिले सहरी क्षेत्रमा बिजुली र इन्टरनेट दुवैका तार भूमिगत गरिँदैछ । तार भूमिगत रुपमा लगिएपछि अब पोल पनि हटाइएको हो ।